Қазақстандық студент Huawei телефонының жаңа үлгісін құрастыруға қатысып жатыр

иллюстрациялық фото: ашықдереккөзден

ERNUR.KZ. Қазақстандық Бекжан Бекболатұлы телекоммуникация саласындағы әлемдік ірі компаниялардың бірі Huawei Тechnologies - тің лондондық офисінде тағылымдамадан өту мүмкіндігіне ие болды, деп жазады 24.kz.

Қазір ол телефонның жаңа моделін жасап жатқан командамен жұмыс істеп жатыр. Бекжан Ақтаудың білім және инновация лицейінің түлегі. Ол бірнеше рет информатикадан өткен республикалық және халықаралық олимпиадалардың жеңімпазы атанған. Бүгінде ол оңтүстік кореялық университеттің үшінші курсында грантта оқиды. Бірақ IT-технологиялар саласындағы ірі компанияда тағылымдамадан өтуге шақыру алғаннан кейін академиялық демалыс алыпты.

«Huawei Technologies Ltd» компаниясының тағылымгері: - "Қазір мен жасанды интеллекттің жаңа әдістемелерін жасап жатырмын. Осы жылы шығарылатын телефондардың жаңа модельдеріндегі фотосуреттердің сапасын арттыру үшін оның қалай көмектесетіндігін зерттеу үстіндемін" - дейді Бекжан Бекболатұлы.

Бекжан жұмысқа бір ай бұрын ғана кіріскен. Сондықтан алдымен білімін жетілдіріп жатыр. Ғылыми әдебиеттерді оқып, негізгі команданың жұмысына қосылуға тырысуда. Жасанды интеллекттің кең етек жаюының арқасында жоғары біліктілікті аз қажет ететін салалардағы жұмыскерлердің саны келешекте кемитіндігіне көзім жетті дейді ол.

"Меніңше, көптеген жұмыстарды жасанды интеллект роботтары атқаратын болады. Қазірдің өзінде жақын болашақта мамандықтардың 40% жоғалып, қарапайым шаруаларды роботтар атқара береді деген болжам бар" - дейді «Huawei Technologies Ltd» компаниясының тағылымгері Бекжан Бекболатұлы

Тағылымдама 8 айға созылмақ. Аяқталған соң Бекжан компаниямен келісім-шартқа отыруы мүмкін. Қалай болғанымен ол өз болашағын Еуропаның IT саласынан көріп отыр. Қазақстаннан әзірге жұмыс іздеуді ойластырмаған. Өйткені біздің елде бұл сала әлі бастапқы деңгейде, дейді ол. Бірақ келешекте туған жерінде еңбек етуді армандайды.