Министр ауруханада кезекте тұрғандардан кешірім сұрады

Денсаулық сақтау министрі ұзақ кезекте тұрып, дәрігердің қарауына кіре алмаған халықтан кешірім сұрады.

Министрдің сын ескертпесінен кейін, ауруханаға дереу қосымша медицина қызметкерлері шақырылды, ал шұғыл түрде жеткізілген науқастар кезектен тыс қабылданды.

Министрдің сапары барысында, жұқпалы аурулар бөліміне жедел жәрдем машиналары үздіксіз ауру белгілері бар пациенттерді әкеліп жатты.

Елжан Біртанов журналистерге берген сұхбатында, осындай жайттар ең алдымен жергілікті атқарушы органдардың салғырттығынан болады деді. Нәтижесін көріп тұрғандай, адамдар ұзын сонар кезекте ыстығы көтеріліп тұрса да күтуге мәжбүр. Оған қоса, қажетті ем-домды дәрігерден ала алмайды. Денсаулық сақтау министрі кезекте тұрған адамдардың барлығынан кешірім сұрады және осындай жағдайлардың алдын алу үшін жергілікті билік органдарымен тиісті жұмыс жүргізілетініне уәде берді.

- Менингит жағдайы тұрақты, бүгінгі күні бізде тек нақты екі пациент бар. Алматы қаласының денсаулық сақтау басқармасының басшылары мына у-шуды өздері жасап отыр. Жұқпалы науқастар үшін қосымша қабылдау бөлмелері ашылғанын айтып ақталады. Ал нәтижесінде жергілікті атқарушы органдар дұрыс жұмыс істемейді. Мен арғы күні оларға өзім хабарласып, қосымша дәрігерлерді шақырып, науқастарға жағдай жасауды талап еттім. Ал бүгін ұзын сонар кезекке куә болып отырмын. Сонда жергілікті органға жұмыс істеу үшін үкіметтің қаулысы керек пе? Жоқ, бұл толығымен бас дәрігердің міндеті. Халықтың алдында ыңғайсызданып тұрмын, кезекте тұрған әрбір азаматтан кешірім сұраймын, - деді министр.

Бір сағатқа жуық уақыт министр халықтың сұрақтарына жауап беріп, шұғыл туындаған мәселелерді шешуге тырысты. Осы уақыт аралығында ауруханаға мекеменің басшылығынан бастап, қызметкерлердің барлығы тартылды.