Оқ атып, көлігімен басып өткен: Алматыда жүргізуші іздестіріліп жатыр

ERNUR.KZ. Алматы полициясы жолда оқ атып, төбелес шығарған "Газель" жүргізушісін іздеп жатыр, деп жазады Sputnik Қазақстан.

Куәгерлердің айтуынша, оқиға Жетісу ауданындағы Первомай мұнай базасы көшесінде болған.

Toyota Chaser мен "Газель" жүргізушілері жолды бөлісе алмағанға ұқсайды.

"Екеуі де батыс бағытта келе жатты. "Газель" жүргізушісі екіншісінің жолын кесті. Осыдан кейін екі көлік те тоқтап, жүргізушілер арасында жанжал шықты", - дейді куәгерлер.

Жолаушылардың бірінің сөзіне сенсек, "Газель" жүргізушісі Toyota автокөлігін тізгіндеген адамды тапаншамен қорқытқан. Кейіннен оқ атып, көлігімен оның үстінен басып өткен. Артынша ізін жасырған.

Оқиға орнына жол полициясының қызметкерлері, анықтаушылар мен криминалистер келді.

Оқиға орнынан қашып кеткен жүргізушінің кім екені анықталды, іздеу жұмыстары жүріп жатыр.

Иномарка жүргізушісі ауыр хәлде жақын маңдағы ауруханаға жеткізілді.