Өскеменде есепші 3 жыл бойы әріптесінің зейнетақы аударымдарын иеленіп келген

ERNUR.KZ. Өскемен қаласында есепші әріптесінің зейнетақы аударымдарынан 1 млн теңге иеленген, деп жазады inform.kz.

ШҚО Полиция департаменті баспасөз қызметінің мәліметіне сүйенсек, 55 жастағы қала тұрғыны бірнеше жыл бойы зейнетақы жинағына ақша түспей келе жатқанын білмей келген. Материалдарды тексеру барысында тәртіп сақшылары алаяқтық жасау фактісін анықтады.
«47 жастағы есепші 2019 жылдың қараша айынан бастап 2022 жылдың мамыр айына дейінгі аралықта өз пайдасын көздеп, жәбірленушінің зейнетақы қорына жалпы сомасы 1 000 000 теңге аудармаған. Криминалдық полиция қызметкерлерінің жедел әрекеттерінің нәтижесінде күдікті полиция бөліміне жеткізілді. Қазіргі уақытта ол өз кінәсін мойындап отыр», - делінген ақпаратта.

Күдіктіге қатысты ҚР ҚК-нің 190-бабы 1-бөлігімен сотқа дейінгі тергеу амалдары жүргізіліп жатыр.