Сәтбаевта бес жасар қызды зорлады деген күдікті тергеу изоляторында асылып қалған

ERNUR.KZ. Сәтбаевта бес жасар қызды ұрлап, зорлады деп айыпталған ер адам Қарағандыда тергеу изоляторы камерасында асылып қалған. Мұндай мәлімет әлеуметтік желілерде тарады, деп жазады Tengrinews.kz.

Ер адамның асылып қалғаны туралы хабарлама Instagram желісінде жарияланды.

"Оны кезекші асылып қалған күйінде тапты. Күдікті 62 жаста еді. Дене жарақаты жоқ. Алдын ала болжам бойынша бұл суицид. Ақпарат сенімді, дереккөздер бұл мәліметті растады", - делінген Желіде тараған хабарламада.

Қарағанды облысы бойынша ҚАЖ департаменті осы хабарламаға қатысты пікір білдірді.

"6 қазанда Қарағанды тергеу изоляторында кішкентай қызды зорлағаны үшін қамауға алынған күдіктінің денесі табылды. Келген жедел медициналық жәрдем бригадасы оның қайтыс болғанын анықтады. Өлімнің алдын-ала себебі - суицид. Тексеру кезінде қайтыс болған адамның денесінде қандай да бір дене жарақаттары анықталған жоқ. Осы дерек сотқа дейінгі бірыңғай тергеу реестріне тіркелді. ҚАЖ департаменті қызметтік тексеру тағайындады", - деді ведомствоның баспасөз қызметі.

Еске салайық, Қарағанды облысы Сәтбаев қаласында тұрғындар бес жасар қызды ұрлады деген күдікке ілінген адамды тергеусіз жазалауды талап еткен болатын. Жоғалып кеткен 5 жасар қызды оның ата-анасы мен қала тұрғындары іздеген еді. Кейін ол қыз қаладағы пәтердің бірінде табылған болатын. Онда ер адам болған.

Артынша, жоғалған қызды іздеу барысында ашуланған тұрғындар полиция ғимараты маңындағы көліктерді өртегені хабарланған еді. Ішкі істер министрі Ерлан Тұрғымбаев оқиғаға қатысты пікір білдірді. ІІМ басшысы тәртіпсіздікке жол бермеу үшін қосымша полиция күштері тартылып, жағдай бақылауға алынғанын айтқан еді.