Сәтбаевтағы халық толқуы: Бірнеше көлік өртенді

24.07.2020 09:31

729

Тәртіпсіздікке қатысушылар жергілікті полиция ғимаратының жанындағы көліктерді өртеп жіберді, деп хабарлады өңір әкімдігі.

ERNUR.KZ. Сәтбаев қаласындағы жағдай тұрақтанды, деп хабарлады Қарағанды облысы әкімдігінің баспасөз қызметі. Мұнда қызды ұрлады деген күдікпен ер адам қамауға алынғаннан кейін тәртіпсіздік басталған болатын, деп жазады sputniknews.kz.

"Қазіргі уақытта қаладағы жағдай тынышталды, күдіктіні полицейлер қамауға алды. Тұрғындар тарады. Сәтбаевқа облыс әкімі кетті. Құқық қорғау органдары бұл жағдайды әділ тергеуге бар күшін салады. Халықтан түрлі арандатушылыққа бой алдырмауды сұраймыз", - дейді облыс әкімі баспасөз қызметінің басшысы Марина Шаповалова.

Ол сонымен қатар қалалық полиция ғимаратының жанында автокөліктерге өрт қойылғанын растады. Шығын көлемі әзірге белгісіз.

Еске сала кетейік, қалада жұма күні кешке жоғалып кеткен бес жасар қыз бейтаныс еркектің пәтерінен табылғаннан кейін тәртіпсіздік басталған болатын.

Қызды бүкіл қаладан іздеді. Бала табылғаннан кейін күдікті тұрып жатқан үйдің қасына бір топ адам жиналды. Адамдар күдіктіні өздері жазалау үшін оны беруді талап етті. Олар барлық пәтердің есігін қағып шығып, тұрғындардың зәресін ұшырған.

Содан кейін адамдар қала әкімдігінің ғимаратына бет алды. Сәтбаев қаласына Ұлттық ұлан күштері тартылды.

Қала билігі баланың анасының жанында екенін хабарлады және тұрғындарды арандатушылыққа бой алдырмауға шақырды.