Субұрқақта екі қызы мен анасын тоқ соқты: Сағынтаев оқиғаға қатысты пікір білдірді

21.06.2021 09:30

431

Қала басшысы зардап шеккендердің тезірек сауығып кетуін тіледі.

Алматы қаласының әкімі Бақытжан Сағынтаев Twitter желісіндегі парақшасында субұрқақта адамдарды тоқ соғу оқиғасына қатысты пікір білдірді, деп хабарлайды ERNUR.KZ.

«Цирктегі субұрқақта қыздар және біреуінің анасымен орын алған қайғылы оқиға полицияның тергеуінде. Мұндай жағдай болмау керек. Зардап шеккендердің тезірек сауығып кетуіне тілектеспін», - деп жазды қала басшысы Тwitter-дегі парақшасында.

Жазатайым оқиға 19 маусым күні кешкі уақытта болған. Куәгерлердің айтуынша, фонтан ішіне кірген балалар металл конструкцияны ұстаған сәтте оларды тоқ соққан. Балаларға көмекке ұмтылған әйелді де тоқ соғып, су ішінде құлап түскен.

Айта кетерлігі, мамандар аталмыш субұрқақты тексеріп шыққан. Қала әкімдігі тексеріс қорытындысы туралы толық ақпарат берілетінін мәлімдеді.

«Eco Almaty» ЖШС басшысы Жанна Асанова Алматы циркінің жанындағы субұрқақтағы жағдайға қатысты түсінік беріп, субұрқақтың техникалық жағдайына тоқталды. Ол субұрқақта «Шомылуға тыйым салынады!», - деген ескерту тақташасы орнатылғанын атап өтті.