ТҮРКІСТАН: Аудан әкімі тұрғындарымен көшпелі кездесулер өткізді

13.07.2022 12:01

922

Аудан басшысы 6 айда атқарылған жұмыстар туралы баяндама жасап, алдағы атқарылатын жұмыстар мен жобалар туралы кеңінен ақпарат берді.

ҚР Президентінің "Әкімдердің халықпен кездесулерін өткізу туралы" Жарлығына сәйкес, Мақтаарал ауданының әкімі Бақыт Асанов ІІІ тоқсанға бекітілген жоспар бойынша Мырзакент кенті мен Жаңажол, Еңбекші, Иіржар ауылдық округтерінің тұрғындарымен көшпелі кездесулер өткізді, деп хабарлайды ERNUR.KZ.

Сонымен қатар, көшпелі кездесулерде Бақыт Насырханұлы халықты толғандырған әлеуметтік мәселелерге баса назар аударып, кент пен округтердегі өзекті мәселелер және оның шешімі туралы айтып өтті. Жиын барысында халыққа да ашық микрофон ұсынылып, тұрғындар аудан әкіміне өздерін толғандырған сұрақтарды қойды.

Аудан басшысы мәселе көтерген және сұрақ қойған әрбір тұрғынға кезекпен жауап беріп, мәселесін жеке айтамын деген тұрғындарға жеке қабылдаулар өткізді. Қабылдауларға құқық қорғау органдардың басшылары, тиісті сала басшылары және аудандық мәслихаттың депутаттары қатысып, мәселесін көтеріп келген әрбір тұрғынға қанағаттанарлық жауаптар беріліп, түсіндіру жұмыстары жүргізілді.

Айта кетейік, қоғамды одан әрі демократияландыру, елде жүргізіліп жатқан реформалар туралы халықты хабардар ету, жергілікті атқарушы органдардың ашықтығын және жауапкершілігі мен есептілігін арттыру мақсатында өтіп жатқан көшпелі кездесулердің ІІІ тоқсанға арнайы жоспары бекітіліп, БАҚ пен аудан әкімдігінің ресми интернет ресурсына, әлеуметтік желілердегі парақшаларына алдын ала жарияланған болатын.