Ұлттық банк төрағасы инфляцияның өсуі тоқтағанын айтты

«Биылғы жылғы 10 айдың қорытындысы бойынша, мұнайдың орташа бағасы бір баррель үшін 70 АҚШ доллары болған кезде, Қазақстанның ішкі жалпы өнімінің өсуі 3,5% болды. Бұл серпін Қазақстан экономикасын дамытудың оптимистік сценарийіне сәйкес келіп, Ұлттық банк ішкі жалпы өнімнің 2021 жылы 3,7-4,0% деңгейінде өсуін күтеді», – деді Ерболат Досаев.

Ұлттық банк жетекшісі биылғы жылғы шілде-тамыз айларында ұзақ сақталатын көкөністер (картоп, сәбіз, қызылша) бағасының жаз айларына тән емес және соңғы жылдардағы рекордтық өсуі тіркелгенін растады. Ет (10,3%), өсімдік майы (54,2%) және қант (25,0%) бағасының өсуі де инфляцияны жеделдеткен.

«Қазақстанда азық-түлікке жатпайтын инфляция, бірінші кезекте, тұтынушылық белсенділіктің қалпына келуі аясында жанар-жағар май (17,0%-ға) және ұзақ пайдаланылатын тауарлар (киім-кешек - 6,1%, аяқ киім - 6,4%, жиһаз – 6,9%, тұрмыстық заттар - 8,5%, автомобильдер – 13,5%) бағасының өсуі нәтижесінде жылдамдады», – деп жеткізді ҰБ басшысы.

Ақылы қызметтерде негізінен электр энергиясы (8,6%), тұрғын үйді жалдау (18,5%) және көлік қызметтері (әуе көлігі – 8,7%) бағасы көтерілген.

Ұлттық банк экономикадағы сұраныстың өсуіне жауап ретінде дезинфляциялық ақша-кредит саясатын жүргізу шеңберінде базалық ставканы 9,0%-дан 9,75%-ға дейін үш рет көтергені белгілі. Осылайша, Ерболат Досаев, Үкімет пен Ұлттық Банктің үйлескен іс-қимылының нәтижесінде биылғы жылғы қазанда 6 ай жылдық инфляцияның жедел өсуі тоқтағанын айтты.

Үкімет азық-түлік бағаларын тұрақтандыру тұрғысында қабылданып жатқан шаралар нәтижесінде, оның ішінде тауар ағындарын бөлу, тұрақтандыру қорларын тиімді қалыптастыру және өнімді форвардтық сатып алу арқылы 2021 жылдың қорытындысы бойынша инфляцияны 8,5%-тен аспайтын деңгейде ұстауды жоспарлап отыр.