Жыл басынан бері 5,6 мыңнан астам этникалық қазақ қандас мәртебесін алды

2021 жылдың басынан бері 5,6 мыңнан астам этникалық қазақ қандас мәртебесін алды, деп хабарлайды ERNUR.KZ.

Еңбек және халықты әлеуметтік қорғау министрлігінің мәліметінше, 1 мамырға дейін 5 685 адам тарихи отанына оралып, қандас мәртебесін алған.

Жалпы 1991 жылдан бастап республикаға 1 млн 76,1 мың этникалық қазақ оралды.

Осы жылдың басынан бастап Қазақстанға келген қандастардың жартысынан астамы (76,9%) Өзбекстаннан, 10,7%-ы ҚХР-дан, 5,4%-ы Түрікменстаннан, 2,9%-ы Моңғолиядан және 4%-ы басқа елдерден келген.

Келген этникалық қазақтар негізінен Алматы (31%), Түркістан (15,8%), Маңғыстау (15,9%) және Жамбыл (7,8%) облыстарында, сондай-ақ Шымкент қаласында (11,4%) қоныстанды.

1 мамырдағы жағдай бойынша еңбекке қабілетті жастағы этникалық қоныс аударушылардың үлесі - 57,2%, еңбекке қабілетті жастан кіші адамдар - 24,6% және зейнеткерлер - 18,2%.

Еңбекке қабілетті жастағы қандастардың ішінде білім деңгейі бойынша 11,1%-ының жоғары, 39,8%-ының арнайы орта, 45%-ының жалпы орта білімі бар және 4,1%-ының білімі жоқ.