Шымкент: Дендросаябақ 10 қырғауылмен толықты

Саябақтың фаунасы ұлғайтып, табиғи ортаны қалыптастыру және тепе-теңдік сақтап қалу үшін бұл құстар Сырдария-Түркістан өңіраралық табиғи паркінен жеткізілді.

Дендросаябақ қаланың қақ ортасында орналасқан кіші орман болып есептеледі. Сондай-ақ, ерекше қорғалатын табиғи аумақ мәртебесі берілген. Кіші орман болғандықтан өзіне тән тыныс-тірішілігімен қоса аң-құстары мен жабайы жануары болуы тиіс.

Айта кетейік, саябақ аумағындағы 3 га жасанды көлде жабайы аққу, қаз, үйрек жерсіндірілген. Қойнауында балықтың бірнеше түрі кездеседі. Сонымен қатар, саябақта 84 қырғауыл, 50 тиын, 23 қоян,10 таус (павлин), 5 жібек және бентамка тауығы, 4 цесарка, 3 теңбіл бұғы, 4 кер бұғы, 1 ергежейлі қой бар. Аталған аң-құстар арнайы бастырмаларда, қорада және еркіндікте жүреді. Олар жем-шөппен толық қамтылған.