Париждегі Grand Slam-да қазақстандық дзюдошылар екі медаль жеңіп алған болатын.
ERNUR.KZ. Бүгін Қазақстан Дзюдо федерациясының президенті Қуанышбек Есекеев пен Халықаралық дзюдо федерациясының (IJF) президенті Мариус Визер Қазақстанда Grand Slam әлемдік турнирін өткізу туралы төрт жылдық келісімшартқа қол қойды, деп жазады baq.kz.
Бүгін Парижде Grand Slam шеңберінде келісімшарт бекітілді, осы құжаттың шарттары бойынша Қазақстан 2023 жылдан 2026 жылға дейін дзюдодан ең беделді халықаралық турнирлердің бірін өткізетін басты алаңға айналады. Біздің елімізде ең беделді әлемдік турнирлердің бірі эксклюзивті атауға ие болды, әлемдік аламан дода «Qazaqstan barysy Grand Slam» деп аталатын болды. Қазақстандағы турнирде дзюдошылар 2024 жылы Парижде және 2028 жылы Лос-Анджелесте өтетін Жазғы Олимпиада ойындарына қатысу үшін ұпай жинайды. Сонымен қатар жарыс аяқталғаннан кейін дзюдодан халықаралық оқу-жаттығу лагері тұрақты негізде өткізіледі.
Қол қою рәсімі кезінде Халықаралық дзюдо федерациясының (IJF) президенті Мариус Визер, IJF үшін турнирді өткізу құқығын көптеген талантты спортшыны баптап шығарған және спорт сүйер қауымы мен жанкүйерлері көп елге беру үлкен мәртебе екенін айтты.
Қазақстандық дзюдоның тарихы терең, сонымен қатар мұнда көптеген ірі турнир өткізіліп келді. Бұл елде Grand Slam турнирін өткізу дзюдоны дамытуға да, оны танымал етуге де жаңа серпін беретініне сенімдімін, - деп атап өтті Визер мырза.
Ал Дзюдо федерациясының президенті Қуанышбек Есекеев еліміздің 2023 жылдан 2026 жылға дейін Grand Slam өткізу құқығын алуы дзюдо федерациясының орасан зор жетістігі және халықаралық турнирлерде Қазақстан туын асқақтатып, лайықты өнер көрсететін барлық спортшылардың ортақ еңбегі екенін атап өтті.
Сонымен қатар Қазақстанның дзюдодан ірі жарыстарды өткізуде айтарлықтай тәжірибесі бар екенін түсіну маңызды – біздің елімізде Гран-при жарыстары, «Masters» турнирі, ерлер мен әйелдер арасындағы әлем чемпионаты, бірнеше рет Азия чемпионаты, сондай-ақ кадеттер арасындағы әлем чемпионаты тұрақты түрде өткізіліп келеді. Ең бастысы - біздің дзюдошылар жоғары спорттық жетістіктерін көрсете білетін, әлемдік аренадағы үздіктердің бірі, - деп атап өтті Есекеев.
