Дархан Сатыбалды «сақалды құрылыстарға» қатысты тапсырма берді

Дархан Сатыбалды «сақалды құрылысқа» айналған нысандарға қатысты тапсырма берді , деп хабарлайды ERNUR.KZ.

Түркістан қаласында мемлекеттен жер алып, инвестициялық жобасын салуға асықпай отырған не құрылыс мерзімін созған жеке кәсіпкерлердің игерілмеген жер телімдері қайтарылуда. Түркістан облысының әкімі Дархан Сатыбалды «сақалды құрылысқа» айналған жобалардың мәселесін түбегейлі шешуді тапсырды.

Аймақ басшысының төрағалығымен облыс аумағында құрылысы жүргізіліп жатқан және енді жүзеге асатын жобалардың сәулетіне қатысты талқылау өткізілді. Оған сәулетшілер, жауапты басқарма басшылары, қала әкімдігі мен өзге де мекемелерден өкілдер қатысты. Жеке кәсіпкерлер жаңа жобаларын ұсынды.

Түркістан облысының әкімі Дархан Сатыбалды құрылыс сапасы мен мерзіміне қатысты жауапты тұлғаларға нақты тапсырмалар берді. Жеке кәсіпкерлерден тұрғын үйлер мен инвестициялық жобаларды бір үлгіде, ұлттық нақышта безендіруді талап етуді ескертті. Жаңа нысандарды орта ғасырлық сәулет өнеріне сай, ұлттық нақышты ұстана отырып, шаһардың ерекше бірегей келбетін сақтауды тапсырды.

Ұсынылған жобалардың бірқатарын мақұлдаған облыс әкімі, кейбірінің дизайны мен түстік үйлесімдері тұрғысынан өзгерістер мен толықтырулар енгізу қажеттігін айтты. Ұсынылған монументтердің функционалдық мағынасы мен эстетикалық мақсатына аса мән беруді тапсырды. Облыс басшысының тапсырмасымен, салынатын ғимараттар халыққа ұзақ жылдар бойы сапалы әрі жайлы қызмет етуі үшін әрбір жоба егжей-тегжейлі қаралады.

«Әкімшілік-іскерлік орталығы мен қаланың мәдени-рухани орталығында салынып жатқан барлық құрылыс барысы қатаң бақылауда. Сондықтан жаңа нысандардың сәні мен салтанаты қаланың ерекше келбетіне сай болуы тиіс. Осы қағиданы ұмыт қалдыруға болмайды. Сондай-ақ жаңа нысандардың барлығы халыққа қолайлы, сапалы, эстетикалық талғамға сай салынуы тиіс. Қызмет көрсету құнын шарықтатуға да жол берілмейді», – деді Дархан Сатыбалды.

Жиында Түркістанның мәдени-рухани орталығында салынып жатқан қолөнершілер шеберханасы бар туристік кешеннің құрылыс барысы баяндалып, безендіру жобалары талқыланды. Сондай-ақ галерея жобасы, жаңа бизнес орталықтар мен ұлттық мейманхана мен балабақшалардың, жаңа сауықтыру кешенінің жобалары ортаға салынды. Олардың құрылысы, ішкі дизайны мен сыртқы көрінісіне қатысты сәулеттік үлгілер талқыланды. Мамандардың ұсыныстары тыңдалды.