"Канал - Қызыл Бархан" операциясымен 9 тонна есірткі тәркіленді

Бүгін Шымкентте Ұжымдық қауіпсіздік туралы шарт ұйымына мүше мемлекеттердің есірткіге қарсы бөлімшелерінің, сонымен қатар Иран және Қытайдың сала жауаптыларының қатысуымен халықаралық есірткіге қарсы «Канал – Қызыл Бархан» операциясы аяқталды, деп хабарлайды ERNUR.KZ тілшісі.

Аталған операцияға ҰҚШҰ қатысушы елдердің есірткіге қарсы қызметтерінің 22 мыңнан аса қызметкері қатысты. Олардың жедел іс-әрекеттері Шымкент қаласында құрылған Халықаралық үйлестіру штабында жүзеге асырылды.

Осы реткі шараға Еуропалық одақ, Еуропа қауіпсіздік және ынтымақтастық ұйымы, Қылмыстық кірістерді заңдастыру және терроризмді қаржыландыруға қарсы іс-қимыл жасау жөніндегі Еуразиялық топ, БҰҰ Есірткі және қылмыс жөніндегі Өңірлік басқарма, ОАӨАҮО халықаралық ұйымдарының өкілдері бақылаушылық жасады.

«Канал – Қызыл Бархан» операциясының негізгі міндеті апиынның контрабанды арналарының жолын кесу, трансұлттық есірткі топтарының қызметін, есірткі кірістерін заңдастырудың алдын алу, заңсыз айналымнан қару-жарақ, оқ-дәрі мен жарылғыш заттарды тәркілеу болып табылады.

Есірткімен күрес барысында аталған шараға қатысқан елдер аумағында заңсыз айналымдағы 9 тонна есірткі, оның ішінде 5 тонна апин, 38 келі героин, 2 тонна синтетикалық есірткі, 800 келі гашиш және 830 келі марихуана тәркіленді.

Әрі заңсыз пайдаланылған 115 бірлік қару-жарақ, 2,5 мыңға жуық оқ-дәрі, 127 мың АҚШ доллар болатын бағалы заттар жиналды.

Арнайы әскерилердің қатысуымен өткен операция барысында 719 есірткі қылмысы ашылып, 7 мыңға тарта қылмыстық іс қозғалды. 500 азамат әкімшілік жауапкершілікке тартылды.

Бұл реткі операция барысында Қызылорда облысында өсірілген қарасора мен Жамбылдың Шу алқабында жабайы өсетін қарасораны заңсыз саудалауға жол берілмеді.

Сондай-ақ, жедел іс-шараға 4 «Тигр» брондалған автокөліктер, 6 бірлік «Багги» сыныпты, 15-тен астам мүмкіндігі жоғары автокөліктер, МИ-171Е тікұшағы іске қосылған.

Арнайы операция шеңберіндеІІМ «Дельта-Долина» бөлімшесінің аумағында Қазақстан мен Қырғызстан ІІМ кинологиялық қызметтерінің бірлескен жаттығуы, қызметтік іздестіру иттерінің көрнекі өнері көрсетілді.