​​РУХАНИ ЖАҢАРУ АЙЫ – РАМАЗАН ҚҰТТЫ БОЛСЫН!

2018 жылдың мамыр айының 17 жұлдызында қасиетті Рамазан айының бірінші күні басталатыны белгілі болған еді. Осыған орай Қазақстан мұсылмандары діни басқармасының Оңтүстік Қазақстан облысы бойынша өкіл имамы, облыстық орталық мешіттің Бас имамы журналистерді шақырып баспасөз мәслихатын өткізді, деп хабарлайды ERNUR.KZ тілшісі.

Жиында сөз алған дін өкілі Рамазан айының қасиеті мен қағидаларын айтып берді.

Бақтыбай Қыдырбайұлы Бейсенбаев, Қазақстан мұсылмандары діни басқармасының Оңтүстік Қазақстан облысы бойынша өкіл имамы, облыстық орталық мешіттің Бас имамы:

- Аса мейірімді, рахымды Алланың атымен бастаймын!

Тәуелсіздігімізбен қатар елімізде Ислам дінін қайта жаңғыртқан Алла Тағалаға мың сан шүкір! Қазіргі уақытта дініміз бен дәстүрімізді қатар алып жүретін дәрежеге жеттік. Жыл сайын дәстүрлі мерекелермен қатар, діни мерекелерді де жоғары дәрежеде атап өтудеміз.

Құрметті мұсылман қауым! Барлықтарыңызды қасиетті Рамазан айының келуімен шын жүректен құттықтап, Алла Тағаладан ел амандығын, жұрт тыныштығын, дінімізге қуат, отбастарыңызға береке-бірлік, барша мұсылман халықтарына Жаратқанның жақсылықтары дарысын деп тілеймін.

Рамазан айында барша мұсылман ораза ұстап, Алла Тағаланың мейір-шапағатынабөленеді, қайырлы iстердi көбейтедi,жүрегiн, тiлiн және барша iс-әрекетiн ғибадатқа бейімдейді.

Рамазан – он екі айдың сұлтаны, кешірімі мол ай. Күнделікті тіршілік қамымен жүретін пенденің жүрегіне бұл айда иман нұры құйылады.

Рамазан – Алланың мейірімі төгіліп, жұмақтың есігі айқара ашылатын, иманды күшейтуге мүмкіндік берілген берекелі ай. Бұл айда мұсылмандар ораза ғибадатын атқарудың нәтижесінде шүкіршілік, шыдамдылық, жанашырлық, сабырлылық, қайырымдылық, мейірімділік, бауырмалдық секiлдi iзгi қасиеттердi тұла бойларына қалыптастырып, имандылықтары артады. Имандылық адамды арсыздықтан арылтады.

Хадис шәріпте: «Адамдарды жәннатқа кіргізетін нәрсе тақуалық пен көркем мінезділік»,- делінген.

Ораза адамды имандылықтың жемісі тақуалыққа тәрбиелейді. Адам шынайы тақуалықты рамазан айында сезінеді. Осы хадисте баяндалғандай, тақуалы адам жәннатқа лайықты.

Жаннат адамының келесі сипаты – көркем мінезділік. Көркем мінезділік нәпсіні тізгіндеуден, тақуалықтан туындайды. Өзін-өзі басқаруы күшті, нәпсісі тәрбиеленген адамның мінез-құлқы жақсы болады. Ондай адам зұлымдық, жамандық жасамайды, басқаға хасат (қызғаныш) қылмайды, күндес болмайды.

Ораза ұстаған адам нәпсісін басқара білуі, мінез-құлқын көркемдеу және тілін жаман сөздерден тыю арқылы оның бойы күнә-кемшіліктерден тазарып, Алланың рахметі мен мағфиратына бөленіп, жәннатқа лайықты ізгі жанға айналады.

Ардақты пайғамбарымыз Мұхаммед (c.а.с.): «Кiм Рамазан айының оразасын шын иман және ықыласпен ұстаса, оның бұрын iстелген күнәлары кешiрiледi», - деген.

«Ораза» арабтың “сиям” деген сөзінен аударылады. «Өзін тыю» деген мағынаны білдіреді. Шариғи терминде «таң атқаннан күн толық ұясына батқанға дейін ниетпен, ішіп-жеуден және жыныстық қатынастан тыйылу» деген сөз.

Ораза адамның рухани жан-дүниесін кемелдендіріп, ой-санасын тазалап, нәпсілік қалауларын тізгіндеуге және Жаратушымен байланысын арттыруға жол ашатын ғибадат.

Қорыта айтқанда, Рамазан айында шынайы құлшылықпен, ораза әдебін сақтай отырып әр күнімізді өткізсек, сонда ғана мінезіміз көркемделіп, иманымыз кемелдене түспек. Рамазан айында ораза ғибадатын шынайы ықыласымызбен ұстауды Алла бәрімізге нәсіп етсін.

Алла Тағала хадис құдсиде: «Адамзаттың барлық амалы өзі үшін, ал ұстаған оразасы Мен үшін, оның сауабын Өзім ғана (білемін және) беремін. Өйткені, ол Менің ризалығым үшін таң атқаннан күн батқанға дейін тағамнан, сусыннан және жыныстық қатынастан бас тартты», - дегеніндей рамазан айында күні бойы қарны ашса да ештеңе жемей, шөлдесе де бір жұтым су ішпей, шыдамдылық танытқан жерлестерімізге Алла Тағаланың нұры жаусын.

Құрметті жерлестер!

Ораза ұстағандарға ауызашар берудің де сауабы мол әрі ол мұсылман баласына тән дәстүр.

Хадистерде ауызашарға келген кісі дастархан басында отырған кезде үй иесіне періштелердің дұға ететіндігі айтылған. Бір хадисте: «Қияметте Алла Тағала кей адамдардан: «Маған неге ас жегізбедің?» – деп сұрайды. Әлгі адам: «Сен барлық әлемдердің Раббысы, Иесісің ғой, мен саған қалайша ас бермекпін?» – дейді. Сонда Алла Тағала: «Қарны аш бауырыңа (ауыз аштырмадың) тамақ бермедің. Егер оған (ауыз аштырғаныңда) маған ас жегізгендей сауап алар едің», – дейді», - делінген.

Аузы берік адамға бір құрма немесе бір кесе су тәрізді азық беру де ауыз аштырудың сауабына кенелтеді.

Сондай-ақ Рамазан айында пітір садақа беріледі. Оны қажеттілігін қоспағанда, мал-мүлкі, дүниесі күміс бағасына жеткен адамның ораза айт күнінде өзі және сәби балалары үшін пітір садақа беруі – уәжіп. Ол – оразаның қате-кемшіліктерін толтыратын, Құдайға шүкіршілік ету үшін берілетін және кедейлерді қуантатын садақа.

«Пітір» сөзі жаратылыс деген ұғымды береді, оны жан садақасы деп те атайды. Пітір садақа екі келі бидай немесе оның өнімдерімен және төрт келі мейіз, құрма немесе арпамен есептеледі. Дегенмен азық-түліктің орнына пітір садақаға оның ақшалай құнын бергені абзал.

Биылғы пітір садақа мөлшері екі келі ұнның орташа бағасымен есептеліп, 300 теңге деп белгіленді. Әйелі және үлкен балаларының жағдайлары жетіп тұрса, олар өздері үшін пітір садақа береді. Ал олар үшін де пітір садақа берген адам, әлбетте, сауаптан құр қалмайды.

Пақыр адамның пітір садақа беруі – уәжіп емес. Егер беретін болса, өзінен де жағдайы төмен адамға бергені дұрыс.

Қалай да орташа дәулетті адам пітір садақаны 2 кг бидай немесе оның өнімдерімен, аса ауқатты адам 4 кг құрма немесе мейізбен бергені абзал. Пітір садақа рамазан айы кіргеннен бастап, ораза айт намазына дейін беріледі. Уақытында бере алмаған жағдайда кейін берсе де болады, бірақ оның сауабы азаяды.

Қадірлі қауым!

Рахым айы – Рамазан құтты болсын! Қасиетті айда ұстаған оразамыз, жасаған дұға-тілектеріміз, құлшылық-ғибадаттарымыз, әрбір қайырлы амалдарымыз қабыл болсын! Алла Тағала отбасымызға амандық, жұмысымызға береке-бірлік нәсіп етсін!

Тәуелсіздігіміз тұғырлы, мемлекетіміздің мерейі әрқашан үстем болып, мәңгілік ел болсын! Әмин!