Төлебиде модульді медициналық пункттердің саны артуда

17.09.2018 14:55

1 581

Оңтүстік және Жоғарғы Қасқасу ауылдарында орнатылған медициналық нысандар толығымен пайдалануға дайын. Жақын күндері Әңгірата, Ақайдар, Алшалы, Төңкеріс, Қорған ауылдарындағы МП-дің монтаждау-жөндеу жұмыстары аяқталып, медициналық жабдықтар әкелінеді.

Биыл Төлеби ауданында 7 елді мекенге орнату жоспарланған модульді медициналық пункттердің құрылысы аяқталуда, деп хабарлайды ERNUR.KZ тілшісі.

Ғимараттарда тамбур, күту-қабылдау, процедуралық емшара, персонал, стерилдеу, дәрілік заттарды сақтау, санитарлық бөлмелерімен қойма, санузел болады.

Біздің ауданымызда сэндвич-панельдерден жасалған модульді МП өткен жылы алғаш рет Бірінші Мамыр ауылдық округінің Ынтымақ ауылында тұрғызылып, бүгінде толық режимде жұмыс жасауда.

Жаңа МП-тер электр қуатымен жылытылады. Қыстыгүні, жүйе ішіндегі температура 25 градус, ал ғимарат ішінде – 24 градус жылы болады.

Ауданда модульдік МП-терді салу ағымдағы жылдың басынан облыстық денсаулық сақтау басқармасының бастамасы бойынша жүзеге асырылуда. Бұл өз кезегінде ауылдық жерлердегі медициналық көмектің сапасы мен қол жетімділігі турасындағы мәселелерді шешеді.

Осылайша, ауыл-аймақта Елбасы көтеріп жүрген денсаулық сақтау саласындағы мемлекеттік саясаттың басты ережелерінің бірі жүзеге асырылуда. МП құрылысы процесіне «Кяклы» ЖШС-і сияқты жергілікті кәсіпорындар қатысуда.

Ал келесі жылы тағы Төлебиде 1 МП, 7 ФАП салу жоспарланып отыр.