ТҮРКІСТАН: Егістікке жаңа технологияны енгізу бойынша семинар-кеңес өтті

Түркістан облысы, Арыс қаласында алдыңғы қатарлы озық технологияларды қолдана отырып, мақта дақылын егудің жаңа технологияларымен тәжірибе алмасу бойынша семинар-кеңес өтті - деп хабарлайды ERNUR.KZ.

Кездесу Байырқұм ауыл округінде «SPK-1» өндірістік кооперативінің егістік алқабында ұйымдастырылды. Семинар-кеңеске облыстық ауыл шаруашылығы басқармасының қызметкерлері, ғылыми-зерттеу институтының мамандары, аудан, қала әкімдерінің орынбасарлары, аудандық ауыл шаруашылығы бөлімінің басшылары, ауыл округ әкімдері мен тауар өндірушілер қатысты. Кездесуде мақта дақылын егудің инновациялық тиімді әдістері туралы, сондай-ақ мақта дақылына мемлекет тарапынан берілетін қолдаулар аясында баяндамалар жасалды.

Елбасы – Тұңғыш Президент Н.Ә.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Жолдауында еңбек өнімділігін және қайта өңделген ауыл шаруашылығы өнімінің экспортын 2022 жылға қарай 2,5 есе көбейту міндетін тапсырған болатын.

Осы ретте өнім көлемін көбейту үшін Түркістан облысында қарқынды жұмыстар басталып, «SPK-1» ауыл шаруашылығы өндірістік кооперативі 2019 жылы құрылған. Онда алдыңғы қатарлы озық технологияларды қолдана отырып, 200 гектар жерге мақта дақылы егілген. Кооператив гектарынан 60-80 центнерден өнім алу жоспарлауда. Облыс бойынша орташа өнімділік 24-25 центнерден болса, аталған шаруашылық 3-еседен артық өнім көп алуды көздеуде. Шаруашылықта алдағы уақытта жалпы 5 мың гектарға мақта дақылын егіліп, 500 адамды жұмыспен қамтылмақ. Жоба құны – 5млрд.теңге.

Аталған шаруашылықта 1-дана ЛС-2284 жер айдайтын трактор, 2-дана Джондир трактор, 2-дана тұқым сепкіш, 2-дана тыңайтқыш шашатын, 1-дана айналмалы соқа, 1-дана жер тегістегіш техникаларымен қамтамасыз етілген. Шаруашылықтағы тұқым сепкіш бір мезетте 6-қызмет атқарады. Атапайтқанда, егілетін мақтаның жүйек аралық қатардағы ірі кесектерін шығарады, тамшылатып суғаратын шлангасын тастау, пленкасын жабу, пленканы желден қорғау үшін екі шетін және ортасына топырақ бастырады, дәлме-дәл тұқым тастау қызметтерін атқарады.

Шаруашылықта мақта алқаптарын сумен қамтамасыз ету үшін 4-дана тік ұңғыма қазылып іске қосылған. Мақта алқаптарын суару үшін 100 пайыз тамшылатып суғару әдісі ендіріліп, толық автоматтандырылып отыр.