ТҮРКІСТАН: Қазығұрт пен Сарыағаштағы жағдайға байланысты комиссия құрылды

Өмірзақ Шөкеевтің тапсырмасымен Қазығұрт пен Сарыағаш ауданындағы жағдайға байланысты комиссия құрылды, деп хабарлайды ERNUR.KZ.

Түркістан облысының әкімі Өмірзақ Шөкеевтің тапсырмасымен Қазығұрт және Сарыағаш ауданындағы жауын-шашын салдарын жою бойынша арнайы комиссия құрылды. Облыс әкімі аппаратының мәжілісінде өңір басшысы елді мекендерді судан тазартып, тұрғындарға заң аясында көмек көрсетуді тапсырды.

«Қазығұрт пен Сарыағаштағы жағдай бойынша арнайы комиссия құрылып, шығындар объективті есептелуі тиіс. Мал шығыны бойынша Ауыл шаруашылығы басқармасы тиісті шешім қабылдап, заң шеңберінде өз міндеттерін орындасын. Бұл – жергілікті, аудандық деңгейде шешілетін мәселе. Біздің жіті назарымызда тұр», – деді Өмірзақ Шөкеев.

Түркістан облыстық төтенше жағдайлар департаментінің бастығы Нұрғали Жүнісов Қазығұрттағы 4 елді мекен мен Сарыағаштағы бір елді мекенде жауын-шашын салдарын жою бағытында түнімен жұмыс жүргенін, әлі де жалғасып жатқанын мәлімдеді. Анықталғандай, 53 үйдің ауласына, сонымен бірге 18 үй, 1 мейрамхана мен 16 ғимаратқа су кірген. Төтенше жағдай салдарын жоюға облыстық төтенше жағдайлар департаментінің 56 және жергілікті әкімдіктің 19 қызметкері жұмылдырылған. 15 техника мен 13 мотопомпа тартылған.

«Адам шығыны жоқ, жағдай толық бақылауға алынған. Мал шығыны есептелуде. Жалпы, қауіп-қатер сейілді. Эвакуацияланған 50 тұрғын өз үйлеріне қайтарылды. Жұмыс жалғасып жатыр», – деді департамент бастығы.