Түркістанда «TurkiSTAR» балалар мен жасөспірімдер фестивалі өтіп жатыр

Түркістан қаласында би жанры бойынша «TurkiSTAR» балалар мен жасөспірімдерге арналған фестиваль басталды, деп хабарлайды ERNUR.KZ.

Түркістан қаласындағы «Конгресс холл» көпсалалы кешенінде би жанры бойынша «TurkiSTAR» балалар мен жасөспірімдерге арналған облыстық өнер фестивалі басталды.

Аталған фестиваль Түркістан облыстық мәдениет басқармасының қолдауымен Мемлекеттік шығармашылық тапсырыс бағдарламасы аясында жеке кәсіпкерлер тарапынан ұйымдастырылған үйірмелер арасында өткізіліп келеді. Бұған дейін ән жанры бойынша өткен болатын. Жыл соңына дейін актерлік шеберлік, көркем сөз оқу және қылқалам, қолөнер шеберлері мен киім дизайны жанрлары бойынша өткізілмек.

Дарынды балаларға қолдау көрсетуге, өскелең өрендеріміздің шеберлігін шыңдап, өнерге ынталандыру мақсатындағы байқау екі кезең бойынша өтеді. Алғашқы кезеңде би ұжымдары халық биін билесе, ақтық кезеңде өз таңдаулары сай еркін тақырыптағы биді билейді.

Екі күнге жоспарланған байқауда облыстың әр аудан, қалаларынан келген 60 би ұжымы бақ сынамақ. Қазылар алқасы құрамында хореография мамандығының ұстаздары мен мәдениет саласының мамандары бар. Әділ қазылар шешімімен ертең жеңімпазпаздарға І, ІІ, ІІІ дәрежелі дипломдар, сондай-ақ арнайы жүлделер мен ынталандыру сыйлықтары беріледі.