Түркістандық футболшылар халықаралық турнирде жеңіске жетті

Түркістан облысының футболшылары халықаралық турнирде чемпион болды, деп хабарлайды ERNUR.KZ.

Шымкент қаласында 2007-2008 жылы туған жасөспірімдер арасында футболдан Қазақстан Республикасының еңбек сіңірген жаттықтырушысы, КСРО-ның спорт шебері Махамбет Сапарбаевты еске алуға арналған халықаралық турнир аяқталды. Футбол додасында Түркістан облысының намысын жоғары деңгейде қорғаған облыстық футбол мектебінің шәкірттері намысты қолдан бермей, барлық қарсыластарын жеңіп, бірінші орынға ие болды.

Жасыл алаңда жасындай жарқылдаған жерлестеріміз өңірде футбол қарқынды дамып келе жатқанын аңғартты. Бұл жетістік — білікті басшы Дәулетияр Әлиев басқаратын Түркістан облысының балалар мен жасөспірімдердің мамандандырылған облыстық футбол мектебі ұжымының жарқын жеңісі.