"Түркістандықтар сақтыққа шақырады" экочелленджі бастау алды

«Түркістандықтар сақтыққа шақырады» экочелленджі басталды, деп хабрлайды ERNUR.KZ.

Мемлекет басшысы Қазақстан аумағында төтенше жағдай жариялау жөніндегі Жарлыққа қол қойды. Осы Жарлықты жүзеге асыру және аты шулы індеттің таралуына тосқауыл қою мақсатында Түркістан облысында да тиісті шаралар қабылданып, жұмыстар атқарылуда.

Осыған орай, облыстың зиялы қауым өкілдері де халық арасындағы алып-қашпа әңгімелерге сенбей, барынша сақтық шараларын орындап, сынаққа сабырлылық танытуға шақырды.

«Дүиені дүрліктерген дерттен біз қазақы мінезімізбен, шыдамдылығымызбен, ежелден дәстүр болған ынтымақ, бірлігіміз арқылы шыға аламыз. Сондықтан баршаңызды жұдырықтай жұмылып, тиісті міндеттемелерді бірге атқаруға шақырамын», - деп сақтық шараларын жасауда немқұрайлылық танытпауға үндеді жазушы, Халықаралық «Алаш» әдеби сыйлығының иегері Мархабат Байғұт.

«Қазіргі таңда біздің өңірде ауыр дертке тосқауыл қою шаралары тиісті деңгейде атқарылуда. Қ.А.Ясауи атындағы ХҚТУ студенттері түгелдей өз үйлеріне қайтарылып, қашықтықтан оқыту жүйесіне қосылды. Әрбір тұрғын, әрбір Қазақстандық өз деңгейінде сақтық шараларының орындалуына мән берсе, бұл сынақты да артқа тастаймыз», - деген профессор Бекжігіт Сердәлі енгізілген шектеулерге қарсылық танытпауды сұрады.

«Осы дерт төңірегіндегі жалған ақпараттар, арандатушылық сипаттағы әрекеттер көптеп тарауда. Дәл осындай кезеңде тек ресми ақпараттарға сеніп, нағыз мамандардың ғана кеңесіне құлақ асуымыз керек. Бұл дерттен аман шығудың алғышарттарының бірі», - деді Республикалық «Айқын» газетінің Түркістан облысындағы меншікті тілшісі Тельман Бейсен.

«Жаһанды жайлаған коронавирус індетіне өзіміздің ішкі иммунитетімізді күшейту арқылы ғана қарсы тұра аламыз. Сондықтан, дүрлігуге жол бермей, барынша сақтық шараларын сақтайық»,- деп төтенше жағдай кезінде той-томалақ, отбасылық жиындардан уақытша бас тарту керектігін жеткізді Сайрам аудандық ардагерлер кеңесінің төрағасы Байназар Әлібек.